តាមរយៈការសង្កេតផ្ទាល់ខ្លួនជាច្រើនឆ្នាំចុងក្រោយនេះ មនុស្សអាក្រក់ឬល្អយើងមិនអាចគ្រាន់តែស្គាល់តាមរយៈពាក្យសម្តី ឬការប្រាស្រ័យទាក់ទងគ្នាក្នុងមួយរយៈពេលខ្លីបាននោះទេ។ ពិតណាស់ ខ្ញុំមិនមែនជាអ្នកចិត្តសាស្រ្ត ឬក៏ជាអ្នករៀនចិត្តវិទ្យាអីដែរ តែខ្ញុំធ្លាប់បានអាននិងកំពុងអានសៀវភៅប្រភេទនេះបានមួយចំនួន រួមផ្សំជាមួយបទពិសោធន៍ដោយផ្ទាល់ ព្រមទាំងការពិនិត្យនិងអង្កេតចំពោះឥរិយាបទ និងប្រតិកម្មរបស់មនុស្សនៅក្នុងកន្លែងការងារអស់រយៈពេលជិត១៥ឆ្នាំកន្លងមកនេះ។
តាមរយៈការសង្កេតផ្ទាល់ខ្លួន ខ្ញុំសូមឆ្លុះបញ្ចាំងតែមួយជ្រុងតូចប៉ុណ្ណោះ គឺចំពោះមនុស្សដែលមានពុតត្បុត ច្រណែនឈ្នានីសអ្នកដទៃ។ មនុស្សជំពូកនេះ ជាពពួកមនុស្សរវៀសរវៃ មានភាពបត់បែនលឿននៅក្នុងបរិបទជាក់លាក់មួយ។ ពួកគេមានការប្រុងប្រយ័ត្នខ្ពស់នៅក្នុងទំនាក់ទំនងសង្គមរបស់គេ ជាពិសេសទៅលើការប្រើប្រាស់ ពាក្យសម្តី កាយវិការ និងការបញ្ចេញប្រតិកម្មផ្សេងៗចំពោះមនុស្សជុំវិញខ្លួន។
មនុស្សប្រភេទនេះ ភាគច្រើនជាអ្នកមានទំនាក់ទំនងក្នុងសង្គមបានល្អប្រសើរ ដោយសារការប្រុងប្រយ័ត្នចំពោះការប្រើប្រាស់ពាក្យសម្តី កាយវិការ និងប្រតិកម្មផ្សេងចំពោះអ្នកនៅជុំវិញខ្លួន និយាយឲ្យចំ គឺជាមនុស្សមានពុតត្បុតច្រើននេះហើយ ទើបគេក្លាយជាមនុស្សមានអ្នកស្គាល់និងប្រាស្រ័យទាក់ទងច្រើននៅក្នុងសង្គមការងារ។
ដោយសារកត្តាអំណោយផលទាំងនេះហើយ ទើបឲ្យមនុស្សប្រភេទនេះអាចកសាងទំនាក់ទំនង និងបង្កើតបក្សពួកបានយ៉ាងងាយស្រួលនៅក្នុងសង្គមការងារ។
ប្រភេទមនុស្សពុតត្បុតនេះ គឺជាមនុស្សពូកែពាក់ស្រោមមុខធ្វើខ្លួនជាមនុស្សចិត្តល្អ ឬក៏ចេះជួយយកអាសារដល់អ្នកដទៃ ឬក៏ចូលចិត្តសម្តែងធ្វើខ្លួនជាជនរងគ្រោះ ជាទុក្ករបុគ្គល ជាមនុស្សគ្មានអំណាច ឬជាមនុស្សទន់ខ្សោយជាដើម។ ពួកគេមានចេតនាព្យាយាមធ្វើជាជនទន់ខ្សោយបែបនេះ ដើម្បីទទួលបានការអាណិតអាសូរពីអ្នកដទៃនៅជុំវិញខ្លួនគេ។
ទង្វើទាំងអស់នេះ គឺដើម្បីទទួលបានការអធ្យាស្រ័យពីមនុស្សនៅជុំវិញខ្លួន ឬក៏អ្នកដឹកនាំនៅក្នុងអង្គភាពមួយ មិនថាជាការអធ្យាស្រ័យដោយសារការបង្កើតឲ្យមានកំហុសក្នុងរឿងការងារ ឬក៏ការធ្វេសប្រហែសចំពោះកាតព្វកិច្ចនិងភារកិច្ចរបស់ខ្លួនទ្បើយ ប្រសិនបើទង្វើទាំងនេះធ្លាក់ចំអ្នកផ្សេងៗឯទៀតនោះ ក៏អ្នកទាំងនោះមិនមានសំណាងទទួលបានការអធ្យាស្រ័យក្នុងស្ថានភាពដូចគ្នានេះដែរ។
ជួនកាលអ្នកប្រើឧបាយកលទាំងនោះនិយាយបំផ្លើសថា ខ្លួនគេមានបញ្ហាសុខភាព ដោយសារកើតមានរឿងរ៉ាវក្នុងរង្វង់គ្រួសាររបស់ពួកគេ។ គោលបំណងបង្កើតចេញជាទង្វើទាំងអស់នេះ គឺដើម្បីតែផលប្រយោជន៍ដែលកេងចំណេញចេញពីការជួយអាណិតអាសូររបស់មនុស្សនៅជុំវិញខ្លួនតែប៉ុណ្ណោះ។
ប្រសិនបើយើងមិនអាចចាប់កន្ទុយមនុស្សប្រភេទនេះបានទាន់ពេលវេលានោះទេ វាពិតជាមានហានិភ័យដល់អង្គភាពការងារនៅថ្ងៃណាមួយជាមិនខាន។ ហានិភ័យនៃការបែកបាក់សាមគ្គីភាពផ្ទៃក្នុង ហានិភ័យក្នុងការបែងចែកបក្សពួក ហានិភ័យនៃការមិនជឿទុកចិត្តគ្នា។ល។
ការរៀបរាប់ទាំងអស់ខាងលើនេះ គឺជាការតាមដាន អង្កេត និងសិក្សាស្វែងយល់ដោយផ្ទាល់របស់ខ្ញុំតែប៉ុណ្ណោះ វាមិនបានឆ្លុះបញ្ចាំងគ្រប់ជ្រុងជ្រួយនោះទ្បើយ។ ប្រសិនបើបងប្អូនចង់ជ្រាបច្បាស់បន្ថែមទៀតនោះ បងប្អូនអាចអានសៀវភៅ (Dark Psychology) ។ បងប្អូនអាចស្នើរសុំ soft copy ពីខ្ញុំជាលក្ខណៈបុគ្គលបាន។
បន្តរៀន បន្តលូតលាស់ 